This website uses cookies so that we can provide you with the best user experience possible. Cookie information is stored in your browser and performs functions such as recognising you when you return to our website and helping our team to understand which sections of the website you find most interesting and useful.
ᓱᓇᐅᖕᒪᑕ ᓂᕿᒃᕼᐊᖅᑯᑦ?
Scroll
ᓂᕿᒃᕼᐊᖅᑯᑦ − ᓂᕆᓂᐊᖅᑕᕗᑦ
ᓂᕿᒃᕼᐊᖅᑯᑦ ᓄᓇᓕᖕᓄ ᐱᒋᐊᖅᑎᑕᐅᓚᐅᖅᑐᑦ ᑕᓗᕐᔪᐊᕐᒥᐅᓂ ᐃᓄᐃᑦ ᑕᐃᑲᓂ ᓂᕿᒃᓴᖃᑦᑎᐊᖅᐸᒍᓂᖅᑐᑦ ᓂᕿᒃᓴᖃᑦᑎᐊᕈᓐᓇᖁᓪᓗᒋᑦ. ᐊᑭᑐᔫᓂᖏᓐᓄᑦ ᐅᓪᓗᒥᐅᓕᖅᑐᖅ ᐱᖁᑎᖃᕆᐊᖃᕐᓂᖅ ᐊᖑᓇᓱᒃᑐᖅᓯᐅᑎᓂᒃ, ᐊᒻᒪᓗ ᐃᖃᓇᐃᔮᒃᓴᖃᖏᓂᖓᓄᑦ, ᐊᒥᓱᑦ ᑮᓇᐅᔭᓕᐅᑦᑎᐊᖏᑐᑦ ᐃᓚᒌᒃᑐᑦ, ᐅᐃᖃᖏᒃᑐᓪᓗ, ᓄᓕᐊᖃᖏᑐᓗᓐᓃᑦ ᐊᒻᒪᓗ ᐃᓐᓇᑐᖃᐃᑦ ᓄᓇᒧᖓᐅᔪᓐᓇᐃᓕᖕᒪᑕ, ᐱᔪᓐᓇᕋᑎᒡᓗ ᐃᓄᒃᓯᐅᑎᓪᓚᕆᖕᓂᒃ ᓂᕆᔭᒃᓴᖏᓐᓂᒃ. ᐊᒥᓱᐊᓗᐃᑦ ᑳᖃᑕᐃᓐᓇᖅᑐᑦ ᓂᐅᕕᕆᐊᖃᐃᓐᓇᖅᓱᑎᒃ ᓂᐅᕕᕐᕕᖕᓂᖔᖅᑐᓂᒃ ᓂᕆᔭᒃᓴᒥᓂᒃ ᑎᒥᒧᑦ ᓈᒻᒪᖏᑦᑐᓂᒃ.
“ᓄᓇᒥᖔᖅᑐᑦ ᐃᒪᖁᑎᑦᑎᓂᒡᖔᖅᑐᓪᓗ ᐱᒻᒪᕆᐅᖕᒪᑕ ᓂᖀᑦ, ᐱᑕᖃᖏᑐᐊᕈᑎᒃ, ᑕᒫᓃᓐᓇᔭᖏᑐᒍᑦ ᐊᒥᓱᐊᓘᔪᒍᑦ ᐅᕙᓂ ᑕᒪᓃᖃᑕᐅᓇᔭᖏᑦᑐᒍᑦ ᐅᓪᓗᒥ”
ᑖᑦ ᑐᓗᕆᐊᓕᒃ (ᒪᒃᑯᒃᑑᖃᑕᖅ ᓇᐅᑦᑎᖅᑐᐃᔨᓂ)ᓂᕿᕼᐊᖅᑯᑦ ᒪᓕᒃᐳᑦ ᓄᑖᒥᒃ ᐃᓅᖃᑎᒌᒃᑐᓄᑦ ᐊᔪᖅᓴᕈᓃᕈᑕᐅᓂᖅᓴᐅᔪᓐᓇᖅᑐᓂᒃ ᐊᒻᒪᓗ ᓂᕿᒃᓴᖃᖅᑎᑦᑎᖔᕈᓐᓇᕐᓂᕐᒥᒃ ᐊᐅᓚᑦᑎᔨᐅᓗᑎᒃ ᒪᓕᒃᑐᓂᒃ ᑐᖓᕕᐅᔪᓐᓇᕐᓂᖏᓐᓂ ᐊᒥᐊᒃᑯᔭᐅᓯᒪᐃᓐᓇᖃᑕᕐᓗᑎᒃ ᐊᖑᓇᓱᒃᑕᐅᖃᑕᕐᓂᖏᓐᓂᒃ ᐆᒪᔪᐃᓪᓗ ᐊᒻᒪᓗ ᐃᖃᓗᒃᓯᐅᕐᕖᑦ ᐊᕐᕕᖅᑑᕐᒥᒃ. ᓈᒻᒪᓈᓪᓗᐊᑦᑎᐊᕐᒪᑕ, ᐊᒥᓱᑦ ᓄᓇᓕᖕᓂ ᐊᖑᓇᓱᒃᑎᑦ ᓱᓕ ᐱᒃᓴᓂᒃᓯᕙᖕᒪᑕ ᑐᓂᓯᕙᒃᓱᑎᒃ ᓄᓇᓕᖕᒥᐅᓄᑦ, ᑕᒪᒃᑯᓇᖓᓪᓗ ᓴᕿᑎᑦᑎᕙᓪᓕᐊᔪᒥᓇᕐᒪᑦ ᐃᖃᓇᐃᔮᕐᕕᒃᓴᓂᒃ ᐃᓄᖁᑎᑦᑎᓐᓂᒃ ᓂᕿᒃᓴᓂᒍᑕᐅᓂᐊᓕᖅᑐᓂᒃ. ᓄᓇᒥᖓᖅᑐᓂᒃ ᐃᒪᕐᒥᒡᓗ ᓂᕿᒃ ᑲᒪᒋᔭᐅᕙᖕᓂᐊᖅᑐᑦ ᓄᑖᕐᒥ ᓂᕿᓕᕆᕕᒃᓴᒥ ᓄᓇᓖᑦ ᐃᓄᐃᑦ ᐱᓕᕆᑎᑕᐅᓗᑎᒃ.
ᑕᐃᓐᓇ ᓂᕿᓕᕆᕕᒃᓴᖅ ᐊᑐᐃᓐᓇᕈᐃᓂᐊᖅᑐᖅ ᐳᖅᑲᖅᑕᐅᓯᒪᑦᑎᐊᖅᑐᓂᒃ ᓂᕆᔭᐅᑐᐃᓐᓇᕆᐊᖃᓕᖅᑐᓂᒃ ᓂᕿᒃᓴᓂᒃ ᓄᓇᖓᓂ ᐊᒻᒪᓗ ᓄᓇᓕᖓᑕ ᐊᓯᐊᓄᑦ ᐊᑭᑐᓗᐊᖅᑕᐃᓕᒪᑎᑕᐅᓂᐊᖅᑐᓂᒃ ᐊᑭᖃᖅᑐᓂᒃ.
ᓂᕿᒃᕼᐊᖅᑯᑦ ᓯᕗᓪᓕᕐᒥ ᐃᓄᖕᓂᖔᓚᕆᒃᑐᖅ ᐱᒋᐊᖅᑎᑕᐅᓚᐅᖅᑐᖅ ᑲᑎᒪᔨᕋᓛᖏᓐᓄᑦ ᑕᓗᕐᔪᐊᑉ ᐊᖑᓇᓱᒃᑏᑦ ᐆᒪᔪᓕᕆᔩᑦ ᑲᑐᔾᔨᖃᑎᒌᖏᓐᓄᑦ ᐊᖑᓇᓱᒃᑎᒃᑯᓐᓄᑦ). ᐃᓐᓇᑐᖃᖏᓐᓂ, ᒪᒃᑯᒃᑐᓂᒃ, ᐊᕐᓇᐃᓪᓗ ᐃᓚᒋᔭᐅᓪᓗᑎᒃ. ᓂᕿᒃᕼᐊᖅᑯᑦ ᑐᓂᔭᐅᓚᐅᖅᑐᑦ 2020−ᒥ ᐅᑭᐅᖅᑕᖅᑐᕐᒥᐅᑦ ᐱᓇᓱᐊᑦᑎᐊᖃᑦᑕᕐᓂᖏᓐᓄᑦ ᐃᑲᔫᑎᒃᓴᓂᒃ ᓵᓚᒃᓴᕐᕕᐅᕙᒃᑐᓂᒃ. ᑕᐃᒃᑯᐊ ᑮᓇᐅᔭᐃᑦ ᐊᑐᖅᑕᐅᕙᓪᓕᐊᓕᖅᑐᑦ ᓴᓇᔭᐅᕙᓪᓕᐊᓂᖓᓄᑦ ᐱᓕᕆᐊᒃᓴᓂᒃ ᐸᕐᓇᐅᑎᒃᓴᐃᑦ, ᐃᓚᒌᓕᕈᑎᒃᓴᓄᓪᓗ ᐊᖏᕈᑎᒃᓴᐃᑦ, ᐊᔪᕈᓐᓂᖅᓴᖅᑕᐅᔭᕆᐊᖃᕐᓂᖏᓐᓄᑦ ᐃᓄᖁᑎᕗᑦ, ᑎᑎᕋᐅᔭᖅᑕᐅᔭᕆᐊᖃᕐᓂᖏᓐᓄᒃ ᓴᓇᔭᐅᔭᕆᐊᓖᑦ ᐊᒻᒪᓗ ᓴᓇᔭᐅᓂᖓᓄᑦ ᓂᕿᓕᕆᕝᕕᒃᓴᐅᑉ.
ᓄᓇᓕᖕᓄᑦ ᐃᑲᔫᑎᒃᓴᐃᑦ
ᓂᕿᒃᕼᐊᖅᑯᑦ ᑮᓇᐅᔭᓕᐅᕋᓱᐊᖅᑎᐅᖏᒪᑕ ᒪᓕᒃᓱᑎᒃ ᑐᖓᕕᖃᖅᑐᓂᒃ ᐃᓄᖕᓂᒃ ᐃᑲᔪᕈᒪᓂᖅ, ᐃᑲᔪᖅᖃᑕᐅᓗᑎᒃ. ᓇᐃᓈᕐᓗᒍ, ᓂᕆᐅᖕᓇᖅᑐᖅ ᐱᐅᓂᖅᓴᐅᓂᐊᖅᑐᑦ ᓂᕿᒃᓴᖃᕈᓐᓇᕐᓂᖏᑦ ᐃᓄᐃᑦ ᐊᒻᒪᓗ ᑎᒥᒃᑯᑦ ᐋᓐᓂᐊᕋᔪᐃᓐᓂᖅᓴᐅᓕᕈᓐᓇᕐᓂᖏᓐᓂᒃ ᑐᕌᖓᓗᑎᒃ ᐃᓄᐃᑦ ᐃᓕᖅᑯᑐᖃᖏᓐᓄᑦ ᐊᒻᒪᓗ ᐃᓪᓕᕐᓇᖅᑑᓂᖏᓐᓄᑦ ᓴᐃᒪᓂᕐᒧᑦ ᐃᓄᒃᓯᐅᑎᓪᓚᕇᑦ ᓂᕿᖏᑦ, ᐱᓗᐊᖅᑐᒥᒃ ᐃᑲᔪᕐᓂᖃᕐᓗᑎᒃ ᐊᔪᖅᓴᕐᓂᖅᓴᓄᑦ ᑮᓇᐅᔭᓕᐅᑦᑎᐊᖃᑕᖏᑦᑐᓄᑦ ᐃᓚᒌᖕᓂ.
ᐊᑯᓂᐅᓂᐊᖅᑐᒥ, ᓂᕿᒃᕼᐊᖅᑯᑦ ᖃᓄᖅᑑᕈᑕᐅᓇᓱᒃᐳᑦ ᐊᑲᐅᖏᓕᐅᕈᑕᐅᓚᕆᒃᑐᓄᑦ ᓂᕿᒃᓴᖃᖏᓗᐊᖃᑕᓕᕐᓂᖏᓐᓄᑦ ᐃᓄᐃᑦ, ᐃᓕᑕᕆᔭᐅᓗᑎᒃ ᐃᓇᖐᔪᓐᓇᖏᓐᓂᖏᑦ ᑎᑭᓴᖅᑕᐅᕙᖕᓂᖏᓐᓂ ᓂᕿᑦ ᓂᐅᕕᐊᒃᓴᐅᓂᖏᑦ ᑕᒪᐃᓐᓂ ᐃᓄᐃᑦ ᓄᓇᓕᖏᓐᓂ. ᑕᒪᕐᒥᒃ ᐃᓚᒌᒃᑐᑦ ᐱᖃᑕᐅᔪᓐᓇᕆᐊᖃᕐᒪᑕ ᐃᓄᒃᓯᐅᑎᓪᓚᕆᖕᓂᒃ ᓂᕿᒃᓂᒃ, ᓄᓇᒥᖔᖅᑐᓂᒃ, ᐃᒪᕐᒥᒡᓗ..
“ᓂᕿᓴᑦᑎᐊᕙᖕᓂᒃ ᐱᔪᒪᕙᒃᑲᑦᑕ ᐊᑐᐃᓐᓇᐅᑎᑦᑐᒪᓪᓗᒋᓪᓗ”
−ᔫ ᐊᓯᕚᒃ, ᐃᓐᓇᑐᖃᖅ
ᓂᕿᒃᕼᐊᖅᑯᑦ ᐃᒪᓐᓇᐅᓕᕈᑕᐅᓂᐊᖅᑐᑦ:
ᓴᕿᑎᑦᑎᓂᖅ
ᓴᕿᑎᑦᑎᓗᑕᐅᓂᐊᖅᑐᑦ ᐅᖓᑖᓃᑦᑐᓂᒃ 15-ᓂᒃ ᑕᓗᕐᔪᐊᕐᒥᐅᓂ ᐃᖃᓇᐃᔭᕐᕕᒃᓴᓂᒃ: ᐃᖃᓇᐃᔭᕐᓗᑎᒃ, ᐊᔪᕈᓐᓂᖅᓴᖅᑕᐅᓗᑎᒡᓗ ᑕᒪᒃᑯᐊ ᐃᓚᐅᔪᓐᓇᖅᑐᑎᑦ ᐊᖑᓇᓱᒃᑏᑦ, ᓂᕿᓕᕆᔨᑦ, ᑎᑎᕋᖅᑏᑦ, ᑲᒪᔨᒋᔭᐅᓂᐊᖅᑐᓄᓪᓗ, ᐊᓯᖏᓪᓗ.
ᐃᑲᔫᑎᒃᓴᖃᑦᑎᐊᒃᑲᓐᓂᕈᓐᓇᕐᓂᖅ
ᓄᓇᓕᖕᓂ ᑕᒪᐃᓐᓂᒃ ᑮᓈᐅᔭᓕᐅᕈᑕᐅᕙᒃᑐᑦ ᐃᑲᔫᑕᐅᑲᓐᓂᕈᓐᓇᖅᑐᑦ ᓂᕿᓕᕆᕕᖓᓂᒃ ᑮᓇᐅᔭᓕᐊᑦ, ᑐᕌᖓᑎᑕᐅᓗᑎᒃ ᓄᓇᓕᖕᓂ ᐱᓕᕆᐊᖑᔪᓄᑦ, ᓲᕐᓗ ᒪᒃᑯᒃᑐᑦ ᐊᖑᓇᓱᒋᐅᖅᓴᓂᕐᒥᒃ ᐃᓕᓐᓂᐊᖅᑎᑕᐅᓂᖏᓐᓂᒃ, ᐃᓐᓇᑐᖃᐃᑦ, ᒪᒃᑯᒃᑐᓪᓗ, ᐊᑯᓐᓂᖅᓱᕐᓂᖏᓪᓗ ᐃᓄᐃᑦ ᑲᑎᒪᑎᑕᐅᕙᖕᓂᖏᓐᓄᑦ, ᓴᓇᔨᐅᔭᕆᐅᖅᓴᓂᕐᒥᒃ ᐊᔪᕈᓃᖅᓴᖅᑕᐅᕙᒡᓗᑎᒃ, ᐊᓯᖏᓐᓂᒡᓗ.
ᕿᓂᖃᑕᕐᓂᖅ
ᕿᓂᖃᑕᕐᓗᑎᒃ ᐊᔾᔨᒌᖏᑦᑑᑎᐅᔪᓂᒃ ᓇᖕᒥᓂᕆᔭᐅᔪᓂᒃ ᐱᕕᒃᓴᕆᔭᐅᓕᕈᓐᓇᖅᑐᓂᒃ, ᐊᒻᒪᓗ ᐊᕕᒃᑐᖅᓯᒪᓂᖏᓐᓂ ᐱᕙᓪᓕᐊᔾᔪᑎᒃᓴᐅᔪᓐᓇᖅᑐᓂᒃ ᑐᖓᕕᖃᖅᓱᑎᒃ ᐆᒪᔪᕐᓂᖓᖅᑐᑦ ᐊᒦᑦ, ᕿᓰᑦ, ᐊᖑᓇᓱᒃᑕᐅᓯᒪᔪᑦ: ᕿᓯᓕᕆᕕᖕᒥᒃ, ᕿᑐᓕᓴᐃᕕᖕᒥᒃ, ᐊᓐᓄᕌᓕᐅᕈᓐᓇᕐᓂᕐᒥᒃ, ᓴᓇᐅᒐᓕᐅᕈᑕᐅᔪᓐᓇᕐᓂᖏᓐᓂᒃ, ᒥᖅᓱᒐᓕᐅᕈᓐᓇᕐᓂᖏᓐᓂᒃ, ᐊᓯᖏᓂᒡᓗ.
ᓇᖕᒥᓂᕆᔭᖏᓐᓂᒃ ᐱᓕᕆᐊᒃᓴᖏᓐᓂᒃ ᐸᕐᓇᐅᑎᒃᓴᐃᑦ ᐊᒻᒪᓗ ᓂᐅᕐᕈᑎᒃᓴᐅᔪᓐᓇᕐᓂᖏᓐᓂᒃ ᐱᕙᓪᓕᐊᑎᑦᑎᓂᖅ
ᑎᑎᕋᖅᑕᐅᓚᐅᕐᒪᑕ ᓇᖕᒥᓂᖅ ᐱᓕᕆᐊᒃᓴᑎᓐᓂᒃ ᐸᕐᓇᐅᑎᒃᓴᐃᑦ ᐱᖓᓱᐃᓪᓕᖃᖓᔪᓂᒃ ᐱᔾᔪᑎᖃᓗᐊᖅᑐᓂᒃ: ᓄᓇᓕᑦ ᐃᑲᔪᖅᑕᐅᔪᒪᓂᖏᓐᓂᒃ, ᐊᑭᑐᓗᐊᖅᑕᐃᓕᒪᔪᓂᒃ ᐊᒻᒪᓗ ᐱᑕᖃᐃᓐᓇᕈᓐᓇᖅᑐᓂᒃ ᐊᒥᐊᒃᑯᓯᒪᖃᑕᐃᓐᓇᕐᓂᒃᑯᑦ. ᖃᐅᔨᓴᓚᐅᕋᑦᑕ 76−ᓂᒃ ᐃᒡᓗᖃᖃᑕᐅᕙᒃᑐᓂᒃ ᐊᖏᕐᕋᖏᓂ ᑐᑭᓯᒋᐊᑎᐊᒃᑲᓐᓂᕈᒪᓪᓗᒋᑦ ᓄᓇᓕᖕᓂ ᓂᕿᒃᓴᖃᕆᐊᖃᕐᓂᖏᑦ: ᐊᒃᓱᕈᕈᑕᐅᕙᒃᑐᑦ ᓂᕿᑖᖃᑕᕈᓐᓇᕐᓂᕐᒧᑦ, ᑮᓇᐅᔭᓕᐅᖏᓗᐊᕐᓂᖏᑦ, ᐃᑲᔪᖅᑕᐅᔭᕆᐊᖃᕐᓂᖏᑦ ᐊᒻᒪᓗ ᓂᕆᐅᓇᕐᓂᖏᑦ. ᑕᑯᓂᐊᓚᐅᕐᒥᔪᒍᑦ ᐊᓯᖏᓐᓂᒃ ᐃᓄᓕᕆᓂᕐᒥᒃ−ᐱᔾᔪᑎᖃᖅᑐᓂᒃ ᓇᖕᒥᓂᖃᖅᑐᓂᒃ ᖃᓪᓗᓈᓂ ᑲᓇᑕᒥ, ᑐᑭᓯᐅᒪᑦᑎᐊᒃᑲᓐᓂᕈᒪᓪᓗᒋᑦ, ᐃᓚᒌᓕᕈᓐᓇᕐᓂᑦᑎᓐᓂᒃ ᐊᓯᑦᑎᓐᓂᒃ.
ᓂᕿᓕᕆᕕᒃᓴᖅ
““ᑕᐃᒃᑯᐊ ᐱᓚᒃᑐᐃᕕᖃᕐᓗᑎᒃ, ᐳᖅᑲᐃᕕᖃᕐᓗᑎᒡᓗ ᐊᑑᑎᖃᕐᓂᐊᖅᑐᑦ ᐱᐅᓯᑐᖃᕐᓄᑦ ᐅᑎᖅᐸᓪᓕᐊᓂᖅ ᐊᖑᓇᓱᒃᐸᖕᓂᕐᒧᑦ, ᐱᐅᓯᑐᖃᕐᓂᒡᓗ ᐃᓕᓐᓂᐊᖅᑎᑕᐅᕙᓪᓕᐊᓗᑎᒃ ᒪᒃᑯᒃᑐᖁᑎᕗᑦ ᐊᖑᓇᓱᒃᑏᑦ, ᐊᒥᓕᕆᔪᓐᓇᕐᓂᕐᒥᒃ, ᐊᒻᒪᓗ ᐱᓚᒃᑐᐃᔪᓇᑦᑎᐊᕐᓂᕐᒥᒃ ᐆᒪᔪᖅᑕᒥᓂᒃ.”
- Joe Ashevak, Elderᓴᓇᔭᐅᓂᖓ ᓂᕿᓕᕆᕕᒃᓴᖅ ᑐᖓᕕᓪᓚᕆᐅᓂᐊᖅᑐᖅ ᓂᕿᖅᕼᐊᑉᑎᓐᓄᑦ. ᓄᓇᓖᑦ ᓄᓇᖓᑕ ᕿᑎᐊᓃᓪᓗᓂ, ᐃᓄᐃᑦ ᐃᖃᓇᐃᔭᖅᑎᑕᐅᓂᐊᖅᑐᑦ ᐱᓚᒃᑐᐃᕙᖕᓂᖅ ᓂᕿᓂᒃ ᐆᑕᐅᓯᒪᖏᑦᑐᓂᒃ, ᐊᑐᐃᓐᓇᕈᐃᓗᑎᒃ ᓂᕆᔭᒃᓴᐅᑲᐅᑎᒋᔪᓐᓇᖅᑐᓄᑦ. ᑕᒪᐃᓐᓂ ᐱᓇᐊᓱᑦᑎᐊᖅᑐᒍᑦ ᐊᑐᕆᐊᖃᖅᑕᑎᓐᓂᒃ ᐊᑐᕈᓐᓇᕐᓂᖅ ᒪᓕᒡᓗᑎᒃ ᓄᓇᓄᒻᒥ ᓴᓗᒪᔭᕆᐊᖃᕐᓂᖏᓐᓂᒃ ᓂᕿᓕᕆᓂᕐᒥᒃ ᐃᖃᓇᐃᔭᕐᕖᑦ ᐊᒻᒪᓗ ᐊᐅᓚᑕᐅᕙᓪᓕᐊᖏᓐᓇᕈᓐᓇᕐᓂᖏᓐᓂ ᖃᓄᐃᓕᐅᕈᑕᐅᕙᓪᓕᐊᓂᖏᓐᓂ ᓂᕿᒃᓴᐃᑦ ᓴᓗᒪᓗᑎᒃ. ᐃᓕᑕᕆᔭᐅᓯᒪᓕᖅᑐᑦ ᓴᓇᔨᐅᖃᑕᖅᑐᑦ ᑲᒻᐸᓂᖓᑦ ᓴᓇᔨᐅᓂᐊᖅᑐᖅ ᓂᕿᓕᕆᕕᒃᓴᒥᒃ, ᐊᒻᒪᓗ ᑎᑎᕋᖅᑕᐅᕙᓪᓕᐊᓕᖅᓱᑎᒃ ᑎᑎᕋᐃᔭᐃᑦ ᐊᑐᕆᐊᓕᖏᑦ ᐃᒡᓗᕐᔪᐊᓕᐅᕐᓂᕐᒧᑦ.
ᐊᓱᐃᓛᒃ ᐱᔭᕆᖅᑕᐅᒍᑎᒃ ᓂᕿᓕᕆᕕᒃᓴᖅᐳᑦ, ᐊᐅᓚᑕᐅᓕᕐᓗᓂᓗ, ᑐᓂᖃᐃᕙᖕᓂᐊᖅᑐᒍᑦ ᓂᕿᓂᒃ ᑕᓗᕐᔪᐊᕐᒥᐅᓄᑦ ᓯᕗᓪᓕᕐᒥ, ᐊᓯᖏᓐᓂᓗ ᓄᓇᕗᒻᒧ ᐱᑕᓕᐊᓘᒍᓂ. ᓯᕗᓪᓕᕐᒥ ᐊᕐᕌᒎᓂᒃ ᐱᖓᓱᓂᒃ ᐱᓕᕆᓕᓵᕐᓂᑦᑎᓐᓂ, ᐊᔪᕈᓐᓃᖅᓴᐃᓂᐊᖅᑐᒍᑦ ᐊᒻᒪᓗ ᑲᒪᔨᖃᓕᓂᐅᓕᕐᓗᑕ ᓂᕿᓕᕆᔨᓂᒃ. ᐊᑯᓂ ᓯᕗᒧᑦ ᑐᕌᒐᖃᖅᑐᒍᑦ ᐊᓯᖏᓐᓂᒃᑕᐅᖅ ᐊᑐᐃᓐᓇᐅᑎᑦᑎᔪᒪᕐᓂᖅ, ᐊᒥᓱᖅᐸᓪᓕᐊᓗᑎᒃ ᐃᖃᓇᐃᔭᕐᕕᒃᓴᐃᑦ, ᒪᑐᐃᖅᑕᐅᓗᑎᒡᓗ ᓂᐅᕕᖅᑎᑕᐅᖃᑕᕈᓐᓇᕐᓂᖏᑦ, ᑎᑭᓴᐃᓗᑎᒡᓗᓐᓃᑦ ᐊᓯᖏᓐᓄᑦ ᐊᕕᒃᑐᖅᓯᒪᓂᖏᓐᓄᑦ ᐊᒻᒪᓗ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓄ ᐊᑐᐃᓐᓇᐅᔪᓐᓇᕈᒫᖅᑐᓂᒃ (ᐊᖏᕈᑕᐅᑦᑎᐊᓚᐅᕐᓗᑎᒃ ᒪᓕᒐᐃᑦ ᒪᓕᒃᑕᐅᑦᑎᐊᕐᓂᖏᓐᓂ ᑲᓇᑕᒥᐅᑦ ᓂᕿᓂᒃ ᖃᐅᔨᓴᖅᑎᖏᓐᓄᑦ).
ᐊᒥᐊᒃᑯᓯᒪᐃᓐᓇᖅᑐᓂᒃ ᐊᖑᓇᓱᒍᓐᓇᕐᓂᕐᒥᒃ ᐸᕐᓇᐅᑏᑦ
ᐱᓕᕆᔨᑦᑎᓐᓄᑦ ᑎᑎᕋᖅᑕᐅᕙᓪᓕᐊᓕᖅᑐᑦ ᐊᒥᐊᒃᑯᓯᒪᐃᓇᕐᓂᕐᒥᒃ ᐊᑐᕐᓗᑎᒃ ᐊᖑᓇᓱᒍᓐᓇᕐᓂᕐᒧᑦ ᐸᕐᓇᐅᑏᑦ ᑐᖓᕕᖕᖃᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᐃᓐᓇᑐᖃᐃᑦ ᐊᒻᒪᓗ ᐊᖑᓇᓱᒃᑎᑦ ᑐᑭᓯᓂᐊᕐᕕᐅᓚᐅᕐᒪᑕ ᑐᑭᓯᓇᖁᔭᐅᓂᖏᓐᓄᑦ ᓄᓇᓕᖕᓄᑦ “ᐊᒥᓱᓂᖏᑦ ᐊᖑᓇᓱᒃᑕᐅᔪᓐᓇᖅᑐᑦ”, ᐆᒪᔪᖅᑕᐅᔪᓐᓇᕐᓂᖏᓐᓂᒃ ᐊᒻᒪᓗ ᐃᖃᓗᒃᓯᐅᖅᑕᐅᔪᓐᓇᕐᓂᖏᑦ ᓂᕿᓕᕆᕕᖕᒧᐊᖅᑕᐅᔪᓐᓇᖅᑐᑦ ᐊᕐᕌᒍᑕᒫᖅ ᐊᒻᒪᓗ ᐊᕐᕌᒎᑦ ᐊᓯᔾᔨᖅᐸᓪᓕᐊᓂᖓᓂᒃ ᓯᓚ ᓄᓇᖓᓗ ᒪᓕᒃᑐᓂᒃ. ᐊᒥᐊᒃᑯᓯᒪᐃᓐᓇᖅᑐᓂᒃ ᐊᖑᓇᓱᖃᑕᕐᓂᕐᒧᑦ ᐸᕐᓇᐅᑏᑦᑕᐅᖅ ᐊᑐᕐᓂᐊᕐᒥᔪᑦ ᑕᑯᔭᐅᕙᖕᓂᖏᓐᓂ ᐊᒻᒪᓗ ᖃᐅᔨᒪᔭᐅᓇᓱᐃᓐᓇᕐᓂᖏᓐᓂᒃ ᑐᒃᑐᓕᕆᓂᕐᒥᒃ, ᐃᖃᓗᖃᕐᓂᕐᒥᒃ, ᐅᒥᖕᒪᖕᓂᒃ, ᓇᑦᓯᕐᓂᒃ, ᐊᒻᒪᓗ ᐳᐃᔨᓂᒃ, ᕿᓇᓗᒐᒐᓴᕐᓂᒃ ᑐᓴᒐᒃᓴᓕᐊᕆᔭᐅᕙᓪᓕᐊᖏᓐᓇᕐᓂᐊᕐᒪᑕ ᓇᐅᑦᑎᖅᑐᐃᔨᖁᑎᑦᑎᓐᓄᑦ. ᐊᒥᐊᒃᑯᓯᒪᐃᓐᓇᖅᑐᓂᒃ ᐊᖑᓇᓱᒍᓐᓇᕐᓂᕐᒥᒃ ᐸᕐᓇᐅᑏᑦᑕᐅᖅ ᐃᓱᒪᒃᓴᖅᓯᐅᕈᑎᖃᕆᐊᖃᕐᒥᔪᑦ ᓄᓇᓕᖕᓂ ᐊᖑᓇᓱᒃᑎᓂᒃ ᓂᐅᕕᐊᒃᓴᖃᕈᒪᖏᑦᑐᓂᒃ ᐊᖑᓇᓱᒃᓯᒪᔭᒥᓂᒃ ᓂᕿᓕᕆᕕᒃᑯᓐᓄᑦ, ᐱᓯᒪᓗᒋᑦ ᐃᖕᒥᓄᑦ ᐅᕙᑦᑎᒥᓂ. ᐸᕐᓇᐅᑎᕗᑕᐅᖅ ᐃᑲᔪᖅᓱᐃᖕᒥᔪᑦ ᐃᓕᓐᓂᐊᖅᑎᑕᐅᓂᐊᖅᑐᓂᒃ ᒪᒃᑯᒃᑐᖁᑎᑦᑎᓐᓂᒃ ᐊᖑᓇᓱᒃᑎᐅᓕᕈᓐᓇᕐᓂᖅ ᐊᒻᒪᓗᑕᐅᖅ ᐃᓕᓐᓂᐊᖅᑎᑦᑎᔪᓐᓇᕈᒫᖅᑐᓂᒃ ᐊᒥᐊᒃᑯᓯᒪᐃᓐᓇᖃᑕᕆᐊᖃᕐᓂᖏᓐᓂᒃ ᐊᖑᓇᓱᒃᑳᖓᒥᒃ ᐱᐅᓯᖃᕐᓂᕐᒥᒃ. ᐸᕐᓇᐅᑎᓕᐊᕆᓯᒪᔭᕗᑦᑕᐅᖅ ᐅᔾᔨᖅᑐᑦᑎᐊᕈᑕᐅᒋᕗᑦ ᐊᒻᒪᓗ ᐊᒥᐊᒃᑯᖃᐃᓐᓇᕐᓂᐊᖅᑐᑦ ᐊᑐᕐᓂᕐᓗᑕᐅᑕᐃᓕᒪᓗᑎᒃ ᐱᑕᖃᐃᓐᓇᖁᓪᓗᒋᑦ ᑕᒪᒃᑯᐊ ᐊᔪᖅᓴᕇᑯᑕᐅᔭᒃᑐᓄᑦ ᐆᒪᔪᐃᑦ ᐊᒥᓲᓂᖏᑦ.
“ᒫᓐᓇᐅᔪᖅ ᑕᓗᕐᔪᐊᕐᒥ ᐆᒪᔪᖃᑦᑎᐊᖅᑐᐊᓘᓂᖓᓄᑦ, ᐸᐸᑕᐅᖁᔭᕗᑦ ᐱᑕᖃᐃᓐᓇᕐᓂᐊᕐᒪᑕ ᐊᒻᒪᓗ ᓂᕿᒃᓴᖃᑦᑎᐊᕈᓐᓇᕐᓂᐊᕐᕋᑕ ᓂᕿᑦᑎᐊᕙᖕᓂᒃ ᑕᐃᑲᖓᑦ ᓂᕿᓂᒃ ᐱᓚᒃᑐᐃᕕᖕᒥ, ᐴᖃᐃᕕᐅᓂᐊᖅᑐᒥᓗ.”
−ᑯᓄᒃ ᐅᓕᑲᑕᓕᒃ, ᐊᕐᓇᖅ ᐃᓐᓇᑐᖃᖅ
ᐃᓕᓐᓂᐊᖃᑕᐅᒋᑦᓯ ᖃᓄᖅ ᐊᒥᓱᕈᖅᐸᓪᓕᐊᓂᖏᓐᓄᑦ ᐅᒥᖕᒪᐃᑦ ᐊᒃᑐᖅᑕᐅᕙᓪᓕᐊᓕᕐᓂᖓᓂᒃ ᐊᕙᑎᕗᑦ, ᐊᒻᒪᓗ ᐊᕙᑎᒥᐅᑕᕆᔭᐅᔪᑦ ᐊᒻᒪᓗ ᖃᓄᖅ ᐊᒃᑐᐃᓂᕐᓗᒌᒃᑯᓯᑐᐃᓂᐊᕐᒪᖔᑕ ᑕᒪᒃᑯᓂᖓ
ᐅᒥᖕᒪᐃᑦ