ᐱᒋᐊᖅᑎᑕᐅᓚᐅᖅᑐᑦ ᑕᓗᕐᔪᐊᑉ ᐊᖑᓇᓱᒃᑎᖏᓐᓄᑦ ᐆᒪᔪᓕᕆᔩᑦ ᑲᑐᔾᔨᖃᑎᒌᖏᓐᓄᑦ (ᐊᖑᓇᓱᒃᑎᒃᑯᑦ)ᐊᕐᕕᖅᑑᕐᒥ ᐃᓄᖕᓄᑦ ᓴᐳᒻᒥᔭᐅᓂᖏᑦ ᐊᒥᐊᒃᑯᔭᐅᓯᒪᔪᓪᓗ ᓄᓇᖏᑦ ᐃᒪᐃᓪᓗ (ᓴᐳᓐᓂᐊᖅᑕᐅᕝᕕᖏᑦi) ᓄᓇᒋᔭᐅᕗᑦ ᑕᐃᒪᖓᓕᒫᖅ ᓴᐳᓐᓂᐊᖅᑕᐅᓯᒪᖁᔭᕗᑦ ᐊᖏᔫᑎᓂᒃ ᕿᓂᕐᕕᐅᖃᑕᕈᓐᓇᕐᓂᖏᓐᓂᒃ ᐊᖏᔪᑎᓂᒡᓗ ᓴᓇᔭᖅᑐᕐᕕᐅᔪᓐᓇᕐᓂᖏᓐᓂᓗᓐᓃᑦ ᐅᔭᕋᓂᐊᖅᑦᑎᓄ.

ᓴᐳᓐᓂᐊᖅᑕᐅᓯᒪᕝᕕᒃᓴᖓᓂ ᓴᐳᓐᓂᐊᖅᑕᐅᓂᐊᕐᒪᑕ ᓄᓇᐃᑦ ᑭᑉᐹᕇᒃᑐᒥᒃ ᐊᖏᓂᓖᑦ 45,039 km2−ᓂᒃ ᑭᓛᒥᑕᓂᒃ ᓄᓇᒥ (ᑕᒫᓂᓐᓂᐊᖅᑐᓂᒃ 0.44% ᐳᓴᓐᑎᓂᒃ ᑲᓇᑕᐅᑉ ᓄᓇᒋᖃᑕᐅᔭᖓᓂᒃ), ᑭᑉᐸᕆᒃᑐᓂᒡᓗ 40,730 km2−ᓂᒃ ᑭᓛᒥᑕᓕᖕᓂ ᐊᕙᓗᐊᓂ ᑕᕆᐅᕐᒥ ᐃᒫᓂᒃ (0.77% ᐳᓴᓐᑎᖏᓐᓂᒃ ᑲᓇᑕᐅᑉ ᑕᕆᐅᖁᑎᖏᓐᓂ) ᐊᒻᒪᓗ ᑭᑉᐹᕇᒃᑐᓂᒃ ᐊᖏᓂᓕᖕᓂᒃ 4,413 km2 −ᓂᒃ ᒃᑭᓚᒥᑕᓕᖕᓂᒃ ᑕᕆᐅᖑᖏᓐᓂᕐᒥ ᐃᒪᕐᓂᒃ. ᑕᒃᑯᐊ ᐊᕐᕕᖅᑑᕐᒥ ᓴᐳᓐᓂᐊᖅᑕᐅᓯᒪᕝᕕᒃᓴᐃᑦ ᐱᒻᒪᕆᐊᓗᖕᓂᒃ ᐃᑲᔪᕐᓂᖃᕐᓂᐊᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᓂᐊᕐᓂᕋᖅᑕᐅᓯᒪᔪᓂᒃ ᓴᐳᓐᓂᐊᖅᑕᐅᖁᔨᓪᓗᑎᒃ 30% ᐳᓴᓐᑎᖏᓃᑦᑐᓂᒃ ᑲᓇᑕᐅᑉ ᓄᓇᖁᑎᓕᒫᖏᓐᓂᒃ ᐊᒻᒪᓗ ᐃᒪᖁᑎᓕᒫᖏᓐᓂᒃ ᑎᑭᓪᓗᒍ ᑕᒪᐅᖓ 2030−ᒧᑦ.

ᓱᓇᐅᖕᒪᑕ ᓴᐳᓐᓂᐊᖅᑕᐅᓯᒪᕝᕕᒃᓴᐃᑦ?

ᐃᓄᐃᑦ ᓴᐳᓐᓂᐊᖅᑕᐅᓯᒪᕝᕕᖏᑦ ᐊᒥᐊᒃᑯᔭᐅᓯᒪᖁᔭᐅᔪᓪᓗ (ᓴᐳᓐᓂᐊᖅᑕᐅᕝᕕᒃᓴᖏᑦ) ᑎᑭᐊᖅᑕᐅᓯᒪᕙᒃᑐᑦ ᒪᓕᒐᖅᑎᒍᑦ ᓴᐳᓐᓂᐊᖅᑕᐅᖁᔭᐅᓂᖅ ᑕᒪᒃᑯᓄᖓ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᑎᒥᖁᑎᖏᓂᓄᓪᓗ ᐱᒻᒪᕆᐅᓂᖅᐹᓂᒃ ᐊᐅᓚᑦᑎᔨᐅᔪᓐᓇᕐᓂᖏᓐᓂ ᑲᒪᔨᐅᓂᖅ ᐊᒻᒪᓗ ᐃᓱᒪᓕᐅᖅᑎᐅᕙᖕᓂᖅ ᓴᐳᓐᓂᐊᖅᑕᐅᖁᔨᓂᕐᒥᒃ ᓄᓇᒥᓂᒃ ᐊᕕᒃᑐᖅᓯᒪᓂᕐᒥᓂᒃ ᐊᕙᑎᓂᖓᓂᒃ ᐊᒻᒪᓗ ᐊᕙᑎᒥᐅᑕᕆᔭᖏᓐᓂᒃ. ᐃᓄᐃᑦ ᓴᐳᓐᓂᐊᖅᑕᐅᓯᒪᖁᔭᖏᑦ ᐊᒥᐊᒃᑯᔭᐅᓯᒪᖁᔭᖏᓪᓕ ᐊᑐᖅᐸᒃᑐᑦ ᐱᐅᓯᑐᖃᕐᒥᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᑐᖓᕕᐅᓗᑎᒃ ᓇᓗᓇᐃᒃᑯᑕᕆᔭᐅᕙᖕᓂᖅ ᓴᐳᓐᓂᐊᖅᑕᖁᔭᐅᓂᖏᓐᓄᑦ. ᒪᓕᒃᑕᐅᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᒻᒪᕆᐅᑎᑕᐅᕙᒃᑐᑦ ᐃᒃᐱᒍᓱᑦᑎᐊᖃᑕᖁᔭᐅᓯᒪᓂᖏᓐᓂᒃ ᓄᓇᒥᓂᒃ, ᐃᓄᐃᑦ ᑕᐃᒪᖓᓕᒫᖅ ᐊᑯᓂᐊᓗᒃ ᒥᐊᓂᕆᔨᐅᖃᑕᐃᓐᓇᕐᒪᑕ ᓄᓇᒥᓂᒃ, ᐃᒪᖁᑎᖏᓐᓂᒃ ᐊᒻᒪᓗ ᐊᔾᔨᒌᖏᑦᑑᑎᐅᔪᓂᒃ ᐆᒪᔪᖃᕆᔭᐅᔪᓂᒃ ᑕᒪᒃᑯᓇᓂ.

ᑕᐃᔅᓱᒪᓂᓕ 1970−ᖏᓐᓂ, ᐃᓐᓇᑐᖃᐃᑦ ᐊᑭᕋᖅᑐᖅᐸᓚᐅᖅᓯᒪᒐᓗᐊᕐᒪᑕ ᐅᖅᓱᐊᓗᒃᓯᐅᖅᐸᒃᑐᓂᒃ, ᒐᓴᓖᒃᓴᖅᓯᐅᕈᒪᔪᓂᒡᓗ ᓄᓇᒥᓂᒃ, ᐊᒻᒪᓗ ᓱᓪᓗᓕᐅᕈᒪᓕᖅᑐᓂᒃ ᑕᒪᒃᑯᓄᖓ ᐊᑐᕋᔭᖅᑐᓂᒃ ᐊᕐᕕᖅᑑᕐᒥ. ᐅᖅᓱᐊᓗᖕᓂᐊᖅᑎᑦ ᒐᓴᓖᒃᓴᖅᓯᐅᑎᓪᓗ ᕿᓂᖅᑎᖏᑦ, ᐊᒻᒪᓗ ᐅᔭᕋᖕᓂᐊᖅᑏᑦ ᑲᒻᐸᓂᖏᓐᓂᒃ ᕿᓂᖅᐸᒃᑐᑦ ᐊᒻᒪᓗ ᐊᖏᔪᑎᓂᒃ ᐅᓯᔨᐅᕙᒃᑐᐊᓗᐃᑦ ᐅᒥᐊᕐᔪᐊᓕᕆᔨᖏᑦ ᐅᕙᑦᑎᓐᓄᑦ ᓄᓇᑦᑎᓐᓄᑦ, ᑕᕆᐅᕐᒥᓗ ᐃᒪᖁᑎᑦᑎᓐᓄᑦ ᐅᓗᕆᐊᓇᕈᑕᐅᖕᒪᑕ. ᐊᒃᑐᖅᑕᐅᓂᕐᓗᒍᓐᓇᕐᒪᑕ ᐊᕙᑎᕗᑦ, ᐊᕙᑎᒥᐅᑕᕆᔭᕗᓪᓗ, ᖃᓄᐃᖏᓐᓂᖏᓪᓗ, ᐊᓐᓂᐊᕈᑎᖃᖏᑐᓪᓗ ᓱᓕ ᐆᒪᔪᖁᑎᒋᔭᕗᑦ ᐊᒻᒪᓗ ᐃᖃᒐᓴᐅᕙᒃᑐᑦ, ᑕᐃᒪᐃᓕᒍᑎᒡᓗ ᐊᒃᑐᖅᑕᐅᓂᐊᕐᒥᔪᒍᑦ ᐃᓅᔪᒍᑦ ᐊᓐᓂᐊᕐᓂᕐᒧᑦ, ᐃᓅᔾᔪᑎᒃᓴᖃᕈᓐᓃᕐᓗᑕᓗ. ᐊᕐᕕᖅᑑᕐᒥ ᓴᐳᓐᓂᐊᖅᑕᐅᓯᒪᕕᒃᓴᐃᑦ ᒪᓕᖕᒪᑕ ᐃᓄᐃᑐᖃᑦᑕ ᐅᖃᐅᓯᕆᓚᐅᖅᑕᖏᓐᓂᒃ, ᓯᕗᓪᓕᐅᓚᐅᕐᓂᖏᓐᓄᑦ ᑕᒫᓂ ᐅᕙᑦᑎᓐᓂᒃ, ᐊᒻᒪᓗ ᐃᓅᔪᒫᕐᒥᔪᑦ ᑭᖑᕚᖅᐳᑦ ᐱᕕᒃᓴᖃᕐᓂᐊᕐᒪᑕ ᐊᑐᕈᓐᓇᕐᓂᖅ ᐊᒥᐊᒃᑯᓯᒪᔭᑦᑎᓐᓂᒃ ᓄᓇᒋᔪᒫᖅᑕᖏᓐᓂᒃ, ᐃᒪᖁᑎᑦᑎᓐᓂᒃ ᐊᒻᒪᓗ ᐆᒪᔪᖁᑎᖏᓐᓂᒃ, ᓴᐳᓐᓂᐊᖅᑕᐅᓗᑎᒡᓗ ᖃᓄᐃᖏᑦᑎᐊᕐᓂᖏᑦ ᐊᒻᒪᓗ ᐱᐅᔪᓂᖏᑦ ᓄᓇᒥᒃ ᐃᒪᕐᒥᖔᖅᑐᓪᓗ ᓂᕿᒃᓴᕆᕙᒃᑕᕗᑦ ᐊᒻᒪᓗ ᐃᒥᒐᒃᓴᕆᕙᒃᑕᕗᑦ.